Thomas Schreiner nih, ""Galatians cakuat ah Paul hi Thawngṭha raldohnak hmun ah a um"" a ti. Zeiruang ah ti ah cun Paul nih Thawngṭha arak a phuanmi zumhnak in an cohlannak thawngin a hrin ṭhan cang i, an hrin ṭhannak tehte ah Pathian Thlarau zong a ngei cangmi Galatia Peng zumtu hna cu Judaizers pawl nih Thawngṭha deu in an rak tuaitaam hna lawng siloin, Paul a lamkaltusinak le a thawngṭha phuanmi zong an rak doh. Cucu Paul nih a theih tikah ca a vun kuat hna i, a lamkaltusinak le Pathian sinin a hmuhmi Thawngṭha biatak cu faakpi in a runven. Judaizer pawl nih an aupimi Thawngṭha deu cu Pathian he kan i remṭhan khawh nakhnga nawlbia zulh le cuarpartan a herh, ti hi a si. Paul nih a lamkaltusinak a runven hnu ah Thawngṭha biatak fianternak a tuah. Pathian sinin kan hmuhmi Thawngṭha biathli cu Galatians cakuat ah hmuh khawh a si. A tlangpi in Paul nih a chimmi cu minung hi Pathian he kan i remṭhannak cu zumhnak thawng lawnglawng in a si, a ti. Reformation lioah zumhnak thawng lawnglawng in Pathian he remṭhannak kan hmuhmi dirhṭhoh duh ah an rak hman ngaingaimi cakuat pakhat zong a si. Bible scholar minthang Warren Wiersbe nih, ""Galatians cakuat cu ṭih a nung"" a ti. Aruang cu 'legalism' timi mah-ṭhatnak in khamhnak kan hmuh khawh timi zumhnak le cawnpiaknak Khrihfabu nih kan tonmi buainak a langhter caah a si. Galatians cakuat hi kan miphun ca zongah ṭih a nung, tiah ka ruah. Aruang cu, nihin kan Khrihfabu cheukhat ah cun kanmah ṭhatnak le dinfelnak zeihmanh um loin Pathian vel thawngin kan hmuhmi khamhnak Khrih kan zumhnak in a lak tein pek kan si nain, Khamh kan sinak dingah mah-ṭhatnak le dinfelnak aa bochanmi kan um caah a si. Asiloah, Khrih kan zumhnak le minung lei tuahsernak fonh ah khamhnak kan hmu, tiah a zummi le aa cawnpiakmi kan um caah a si. Hi bantuk cawnpiaknak hi Paul nih ""Thawngṭha dang"" a timi a si i, hrang ngaiin a dohmi, a phuangtu zong chiat a serhmi hna an si. Galatians hi Dal 6 te lawng a si nain Pathian biathli thuk tampi hngalhnak a kan pek. A bikin Zumhnak thawngin thiamcoter kan si timi Khrihfa kan zumhnak (doctrine) i a biapi taktakmi Khrihfa a simi paoh nih i fian lo awk ṭha lomi hi kan hmuh khawh lai. Cun Galatians cakuat kan relnak in Paul nunnak, a lamkaltusinak, a rianṭuannak, Pathian sinin a hmuhmi Khamhnak a kan petu Thawngṭha biatak, Nawlbia le Pathian biakamnak an i pehtlaihnak, Thiang Thlarau rianṭuannak le Khrihfa nun ah a biapimi Pathian biathli tampi kan hmuh khawh lai i a luatmi bantukin aa lunglawmhnak in a khatmi nun ah a kan hruai fawn lai.
